კატის ყოლა 5 წლით აეკრძალა - ზუმას ვერდიქტი გამოუტანეს

„ვესტ ჰემის“ ფეხბურთელს, კურტ ზუმას ცხოველისადმი სასტიკად მოპყრობის ფაქტზე განაჩენი გამოუტანეს. მაისის ბოლოს, 27 წლის ფეხბურთელმა კატის ცემა აღიარა და ამ წუთამდე სასამართლოს გადაწყვეტილების მოლოდინში იყო.

ბრიტანული პრესის ინფორმაციით, ზუმას სასჯელად საზოგადოებისათვის სასარგებლო შრომა განესაზღვრა 180 საათის ოდენობით. ამასთან, მას კატის ყოლა მომდევნო 5 წლის განმავლობაში აეკრძალა.

BREAKING: West Ham defender Kurt Zouma sentenced to 180 hours community service and banned from keeping cats for five years. After pleading guilty to two counts of causing unnecessary suffering to a protected animal. pic.twitter.com/gfp9i235Bd

— Sky Sports News (@SkySportsNews) June 1, 2022

შეგახსენებთ, რომ რამდენიმე კვირის წინ, სოციალურ ქსელებში ვიდეო გავრცელდა, რომელზეც ზუმას დანაშაულია ასახული. იგი საკუთარ კატას ფიზიკურად უსწორდება და „ნისლიან ალბიონზე“ მის ქმედებებს დიდი გამოხმაურება მოჰყვა. მომხდარის გამო სპონსორებმა მასთან კონტრაქტი გაწყვიტეს, ხოლო „ჩაქუჩებმა“ ფულადი ჯარიმა დააკისრეს.

მომხდარის შემდეგ, ფრანგ უკანახაზელს კატა ცხოველთა დამცველებმა წაართვეს. შინაური ცხოველი ვეტერინარს გაასინჯეს და საბედნიეროდ, მას სერიოზული დაზიანებები არ აღენიშნებოდა. ინციდენტის შემდეგ, პეტიცია შეადგინეს და ზუმას დასჯას ითხოვდნენ, რამაც შედეგი გამოიღო.