ფრანგული მედია: აბჟანდაძე კარიერას მონტობანში გააგრძელებს

Midi Olympique-ს ცნობით, თედო აბჟანდაძე კარიერას ''მონტობანში'' გააგრძელებს. 22 წლის ქართველი მორაგბე, რომელიც 2019 წლიდან TOP 14-ში ''ბრივისთვის'' თამაშობდა, შემდეგ სეზონში რანგით მეორე ლიგის Pro D2-ში იასპარეზებს.

1903 წელს დაარსებული ''მონტობანი'' საფრანგეთის ჩემპიონი 1967 წელს გახდა. გარდა ამისა, Pro D2-ის ჩემპიონობა ორჯერ იზეიმა (2001, 2006).

2021-22 წლების სეზონში ქართველმა მგეზავმა TOP 14-ში 7 მატჩი ჩაატარა, მოედანზე 352 წუთი გაატარა, მის ანგარიშზე 22 ქულაა. აბჟანდაძეს ''ბრივში'' მცირე სათამაშო დრო ჰქონდა, რაც კლუბის შეცვლის მთავარი მიზეზია.

''ბრივის'' გარდა ქუთაისის ''აიასა'' (2016-17, 2018-19) და ირლანდიურ ''ტერენორ კოლეჯში'' ირიცხებოდა.

რაც შეეხება სანაკრებო კარიერას, თედო აბჟანდაძე 2018 წლიდან საქართველოს ეროვნული ნაკრების ღირსებას იცავს, 26 მატჩში მის აქტივში 160 ქულაა.