"საუკეთესო ვარიანტს ავირჩევ" - დიბალა საკუთარ მომავალზე
პაულო დიბალა მომავალი სეზონიდან ახალ კლუბში ითამაშებს, თუმცა სად ჯერჯერობით უცნობია. არგენტინელმა შემტევმა „იუვენტუსი“ დატოვა და მას არაერთ ევროპულ გუნდს უკავშირებენ.
პაულო სამუელ ეტოოს მიერ ორგანიზებულ ლეგენდების მატჩზე იმყოფებოდა, სადაც Sky Sports-ის ჟურნალისტს ესაუბრა.
დიბალა:
„პირველ რიგში, აქ ყოფნით ბედნიერი ვარ. მირჩევნია ამ მატჩზე გესაუბროთ და არა ჩემს მომავალზე, თუმცა ფრანჩესკო ტოტის ინტერესს გვერდს ვერ ავუვლი. ის ჩემი იდეალია. ფრანჩესკო ჩემზე ყოველთვის სიყვარულით საუბრობს. ახლა მშვიდად ვარ და გადაწყვეტილებას მალე მივიღებ.
ვეცდები ჩემთვის საუკეთესო ვარიანტი შევარჩიო. კიმპემბესთან არაფერზე მისაუბრია და გთხოვთ ჭორებს ნუ აჰყვებით. „პარი სენ ჟერმენის“ ინტერესზეც ვერაფერს გეტყვით. ყველაფერს სულ მალე გაიგებთ და კმაყოფილები დარჩებით.“
შეგახსენებთ, რომ არგენტინელი ვარსკვლავით ისეთი გუნდები ინტერესდებიან როგორებიც „ტოტენჰემი“, „არსენალი“, „ინტერი“ და „რომა“ არიან. გასულ კვირას, ცნობილი გახდა, რომ „ჯალოროსის“ ლეგენდა ფრანჩესკო ტოტი დიბალას პირადად ესაუბრა და „რომაში“ გადასვლა სთხოვა. მეტიც, ლეგენდარულმა იტალიელმა მას 10-ნომრიანი მაისური შესთავაზა.
Le parole di Paulo #Dybala sul suo futuro durante la partita di beneficenza #IntegrationHeroes https://t.co/N39WXCTWAw
— Gianluca Di Marzio (@DiMarzio) May 23, 2022
