დიდი გუნდის დიდი გამარჯვება - 41 წელი დინამოს ევროპული ტრიუმფიდან
ზუსტად 41 წლის წინ, 1981 წლის 13 მაისს თბილისის "დინამომ" ისტორიაში ყველაზე მნიშვნელოვანი ტიტული მოიპოვა.
თბილისელებმა თასების მფლობელთა თასის ფინალში იენის "კარლ ცაისი" 2:1 დაამარცხეს.
შეხვედრა დიუსელდორფში გაიმართა. 63-ე წუთზე გერმანელებმა ჰოპის გოლით ანგარიში გახსნეს. 4 წუთში ვლადიმერ გუცაევმა ანგარიში გაათანაბრა. გამარჯვების გოლი კი 87-ე წუთზე ვიტალი დარასელიამ გაიტანა და ქართული ფეხბურთის ისტორიაში პირველად და ჯერჯერობით უკანასკნელად, ჩვენმა კლუბმა ევროთასი მოიგო.
ქართველ გულშემატკივარს ეს უდიდესი წარმატება პირველმა ლეგენდარულმა მსახიობმა და კომენტატორმა - კოტე მახარაძემ მიულოცა. თბილისის ქუჩებში კი ხალხი გავიდა და ტრიუმფი ერთობლივად აღნიშნა. ნოდარ ახალკაცის "დინამო" - გუნდი, რომელმაც ერი გააერთიანა და უდიდესი სიხარული აჩუქა.
