"საოცარი პიროვნებაა და ბრწყინვალე დონეზეა" - ბორდალასი მამარდაშვილზე

ლა ლიგის 34-ე ტურში ვალენსიასა და ლევანტეს შეხვედრა ფრედ 1:1 დასრულდა. ანგარიში მასპინძლებმა გახსნეს, გაიას პასით უგო დურომ გაიტანა. 31-ე წუთზე არბიტრმა გაია მოედნიდან გააძევა, სტუმრებმა მატჩის დარჩენილი დრო რიცხვობრივ უპირატესობაში გაატარეს, 81-ე წუთზე ოსკარ დუარტემ გაუტანა მამარდაშვილს.

ღამურების სასტარტოში გიორგი მამარდაშვილმა ითამაშა. მის აქტივში 5 "სეივია". ქართველი მატჩის საუკეთესო მოთამაშედ, "მატჩის მეფედ" დასახელდა.

მატჩის შემდეგ ვალენსიას მთავარმა მწვრთნელმა ხოსე ბორდალასმა მამარდაშვილი შეაქო:

"არ ვიცი იგეგმება თუ არა მამარდაშვილის გამოსასყიდი თანხის გაზრდა, ეს კლუბის საქმეა, მე ვერაფერს გეტყვით. შემიძლია გითხრათ, რომ გიორგი მამარდაშვილი საოცარი პიროვნებაა და ბრწყინვალე დონეზე თამაშობს. მისით ძალიან კმაყოფილები ვართ." 

ამ სეზონში ლა ლიგისა და სამეფო თასის ჩათვლით მამარდაშვილმა 19 მატჩი ჩაატარა, მათგან 8 მატჩში გოლი არ გაუშვა. რაც შეეხება კონკრეტულად ლა ლიგას, ბორდალასმა სასტარტოში 15 შეხვედრაში დააყენა, 7 შეხვედრაში კარი მშრალად შეინახა. მოგეხსენებათ, 21 წლის მეკარემ ესპანეთის თასის ფინალში ითამაშა, სადაც მისი გუნდი ბეტისთან პენალტების სერიაში დამარცხდა.

34 ტურში ვალენსიას ანგარიშზე 43 ქულაა, მე-10 ადგილზეა. 7 მაისს, ბორდალასის გუნდი ბილბაოს ატლეტიკს სტუმრად დაუპირისპირდება.