ჩელსის სანაცვლოდ 500 მილიონით მეტი მოითხოვა - აბრამოვიჩი ქველმოქმედებისთვის 2.5 მილიარდს გაიღებს

„ჩელსის“ მფლობელმა, რომან აბრამოვიჩმა „არისტოკრატების“ შეძენის მსურველებს შეატყობინა, რომ კლუბის სანაცვლოდ 500 მილიონი გირვანქა სტერლინგით მეტის გადახდა მოუწევთ. Sky Sports-ის ინფორმაციით, აღნიშნული თანხა ქველმოქმედებას მოხმარება.

მოლაპარაკებების გადამწყვეტ ეტაპზე, „ჩელსის“ შეძენის 3 პრეტენდენტია დარჩენილი და აბრამოვიჩის მოთხოვნაზე სამივე მათგანმა თანხმობა განაცხადა. მათ 500 მილიონის მოსაძიებლად დრო კვირის ბოლომდე აქვთ და ფინალური პრეზენტაცია რამდენიმე დღეში გაიმართება.

Sky Sports-ის ცნობით, აბრამოვიჩი დაჟინებით ითხოვს, რომ კლუბის გაყიდვისთანავე, 1 მილიარდი გირვანქა სტერლინგი ქველმოქმედებას მოხმარდეს და სურს, რომ საერთო ჯამში, ეს თანხა 2.5 მილიარდამდე გაიზარდოს. ამასთან, რუს ოლიგარქს უნდა, რომ „ჩელსის“ ახალმა მფლობელმა კლუბში 1-1.5 მილიარდის ოდენობის ინვესტიცია განახორციელოს, რომელიც სტადიონს, აკადემიასა და ქალთა ფეხბურთს მოხმარდება.

შეგახსენებთ, რომ „ჩელსისთვის“ ბრძოლას აგრძელებენ: კონსორციუმი, რომლის წევრებიც ლუის ჰემილტონი და სერენა უილიამსი არიან; ბეისბოლის გუნდის, ლოს ანჯელეს დოჯერსის მფლობელი ტოდ ბოლი და ბოსტონ სელტიქსისა და „ატალანტას" მფლობელი სტივენ პაგლიუკა.