ხუთი თვე გაუცდება - თბილისის დინამოს მეკარეს ოპერაცია ჩაუტარდება

თბილისის ''დინამოს'' 22 წლის მეკარემ, დავით კერესელიძემ ბათუმის ''დინამოსთან'' შეხვედრაში მხრის ტრავმა მიიღო. CrystalSport-ის ცნობით მოთამაშეს ოპერაცია ჩაუტარდება. მისი უთამაშებლობის მაქსიმალური პერიოდი ხუთ თვეა, თუმცა შესაძლოა, მინდორს უფრო ადრე დაუბრუნდეს და ხუთთვიანი პერიოდი არ დასჭირდეს.

კერესელიძე საქართველოს ყველაზე ტიტულოვან კლუბს გასულ ზამთარში შეუერთდა, კრისტალბეთ ეროვნული ლიგის საწყის ორ ტურში სასტარტოში ითამაშა, ბათუმის ''დინამოსთან'' მიღებული ტრავმის შემდეგ კი ესპანელმა ანდრეს პრიეტომ შეცვალა.

კერესელიძე საქართველოს 17 და 21 წლამდე ნაკრებების ყოფილი წევრია. 2015-18 წლებში ''ცხინვალის'' შემადგენლობაში ირიცხებოდა, 2018 წლიდან გასული სეზონის ბოლომდე ''გაგრას'' მოთამაშე იყო.

2020 წლის სეზონში კერესელიძე ''გაგრასთან'' ერთად საქართველოს თასის მფლობელი გახდა. გასულ ზაფხულში დავით კერესელიძის საერთაშორისო დებიუტი შედგა, კონფერენს ლიგის პირველ საკვალიფიკაციო ეტაპზე ''სუტიესკას'' წინააღმდეგ ორივე მატჩი სასტარტოში შეუცვლელად ჩაატარა.

მასალაში გამოყენებულია თბილისის ''დინამოს'' პრესსამსახურის ფოტო