,,მთელი ცხოვრება საქართველოს შევალიე" - სანეევი სამშობლოსა და რეკორდებზე
სამგზის ოლიმპიური ჩემპიონის, XX საუკუნის საქართველოს საუკეთესო სპორტსმენის, საქართველოს ეროვნული ოლიმპიური კომიტეტის ერთ-ერთი დამფუძნებლის, ვიქტორ სანეევის გარდაცვალებამ მსოფლიოს სპორტულ საზოგადოებრიობაში დიდი რეზონანსი გამოიწვია.
სოხუმში დაბადებულ ვიქტორ სანეევს არასოდეს უთქვამს უარი თავის სამშობლოზე და არაერთი წინადადების მიუხედავად, მთელი ხანგრძლივი სპორტული კარიერის მანძილზე საბჭოთა კავშირის ნაკრებში საქართველოს წარმოადგენდა. დიდი სპორტიდან წასვლის შემდეგ, იგი თავის მეუღლესთან და ვაჟიშვილთან ერთად უკანასკნელი 30 წლის მანძილზე ავსტრალიაში, სიდნეიში ცხოვრობდა და 2022 წლის 2 იანვარს სიდნეიში, 76 წლის ასაკში გარდაიცვალა.
,,საქართველოში დაბრუნებას თუ ვაპირებ ვნახოთ... მთელი ცხოვრება საქართველოს შევალიე. საქართველო იყო და არის ჩემი სამშობლო", - სანეევთან დაკავშირებულ მასალას არიქივიდან Ambebi.ge ავრცელებს.
1968 წელს მეხიკოში, XIX ოლიმპიურ თამაშებზე 17 მეტრი და 39 სანტიმეტრი გადავლახე და ჩემპიონობასთან ერთად მსოფლიო რეკორდსმენის ტიტული მოვიპოვე. ეს ტიტულები სახელგანთქმულ პოლონელ იუზეფ შმიდტს ჩამოვართვი, უშეღავათო და მძაფრი ბრძოლა იყო. 1972 წელს, მიუნხენშიც შეუპოვრად ვიბრძოლე. მეტოქეებად შესანიშნავი ოსტატები მყავდა, მაგრამ მაინც ვაჯობე. 1976 წელს მონრეალის ოლიმპიურ თამაშებში კი ჩემი მეტოქე ახალგაზრდა ბრაზილიელი სპორტსმენი ჟოაო ოლივიერა იყო... სპორტი ყოველთვის დიდ სიხარულსა და სიამოვნებას მანიჭებდა. ყოველთვის მხოლოდ გამარჯვებისთვის ვიბრძოდი, ყოველი ახალი გამარჯვება წინაზე ძნელად მოდიოდა.
ყველაზე დიდ წარმატებას მეხიკოს ოლიმპიურ თამაშებში გამარჯვებას მივიჩნევ. ყველაზე დიდი ბრძოლა იქ გადავიტანე. მახსოვს, სახტომ ბილიკზე, ჰაერში შევამჩნიე, რომ რეკორდის აღმნიშვნელ ალამს გავცდი. ქვიშაში ამოსვრილი ვფიქრობდი, ნუთუ გავიმარჯვე-მეთქი.
1980 წლის ოლიმპიადაზე ურთულესი პერიოდი მქონდა. ტრავმები საშინლად მაწუხებდა, იანაც (მეუღლე) დაიღალა ოლიმპიადებში ჩემი მონაწილეობით. მე კი ნებისმიერ ამინდში მაინც სტადიონისკენ გავრბოდი, მთელი დღის განმავლობაში ვვარჯიშობდი... ოქროს მედლამდე 20 სანტიმეტრი დამაკლდა, 17 მეტრსა და 24 სანტიმეტრზე გადავხტი. ეს კი ვერცხლის მედალი იყო.
ვარჯიში არ უნდა გეზარებოდეს, მშიშარა არ უნდა იყო, არ უნდა გქონდეს წაგების კომპლექსი. ყველაზე დამღუპველი კი შენი წაგების სხვისთვის გადაბრალებაა.
ხატზე დავიფიცებ, რომ არავითარ სტიმულატორს არ ვიღებდი. ეს ჩემი პრინციპი იყო!
გასული საუკუნის ბოლოს მიცემულ ერთ-ერთ ინტერვიუში მან თქვა, რომ ყველაფრის მიუხედავად, დაკრძალვა მშობლიურ მიწაში ერჩია, სახელმწიფომ სრული მზადყოფნა და სათანადო პატივით დაკრძალვის სურვილი გამოთქვა, თუმცა ვიქტორ სანეევის მეუღლემ, იანა ხვარწკიამ საქართველოს ეროვნული ოლიმპიური კომიტეტის პრეზიდენტს, ლერი ხაბელოვს ელექტრონული ფოსტით წერილი გაუგზავნა, სადაც ნათქვამია, რომ ოჯახმა გადაწყეტილება მიიღო - ვიქტორ სანეევი სიდნეიში დაიკრძალება.
მომზადებილია Ambebi.ge-ს მიხედვით
