დემჩენკო: ,,საბურთალოსთან მატჩი სამეულისთვის გადამწყვეტი იქნება"
საქართველოს კრისტალბეთ ეროვნულ ლიგაში 33-ე ტური დასრულდა და რანგით უმაღლესი ლიგის ფინიშამდე არც ისე შორია.
5-მატჩიანი წაუგებელი სერია აქვს გორის დილას, რომელმაც ბოლო ტურში, გორში, თენგიზ ბურჯანაძის სახელობის სტადიონზე ქვეყნის მოქმედი ჩემპიონი, დინამო თბილისი მიიღო და მინიმალური სხვაობით დაამარცხა (1-0). არადა, თუ ამ მატჩს დინამო თბილისი მოიგებდა, სატურნირო ცხრილში დაძაბულობა კიდევ უფრო შესამჩნევი გახდებოდა.
მატჩში ერთადერთი გოლი 47-ე წუთზე გავიდა. დილას გამარჯვება ირაკლი ბიძინაშვილმა მოუპოვა.
ანდრი დემჩენკო (დილას მთავარი მწვრთნელი)
ემოციურად დატვირთული და სანახაობრივი მატჩი გამოვიდა, ერთმანეთს ორი კარგი გუნდი ხვდებოდა. გუნდებმა კარგი ხარისხის ფეხბურთი აჩვენეს. ვიმედოვნებ, რომ მაყურებელმა სიამოვნება მიიღო.
რაც შეეხება უშუალოდ თამაშს, მომენტები ორივე მხარეს იქმნებოდა, თუმცა ფორტუნა ჩვენს მხარეს იყო. ამ თამაშმა ფსიქოლოგიური მუხტი მოგვცა მომავალი, ძალიან მნიშვნელოვანი მატჩისთვის, რომელიც საბურთალოსთან გველის. ეს მატჩი სამეულისთვის ბრძოლაში ერთ ერთი გადამწყვეტი იქნება, თუმცა, თელავთან და დინამო ბათუმთან დარჩენილი შეხვედრებიც ძალიან პრინციპულია და მნიშვნელოვანია.
ფოტო: საქართველოს ფეხბურთის ფედერაცია
33 ტურის შემდეგ, დემჩენკოს დილას 59 ქულა აქვს და მე-4 ადგილზე მყოფ ლოკომოტივზე 8 ქულითაა წინ და ამ ეტაპზე, ევროზონაშია.
მოგეხსენებათ, საქართველოს კრისტალბეთ ეროვნული ლიგა 36 ტურით დასრულდება, დილას განრიგი კი ასეთია:
20 ნოემბერი, 16:00 | საბურთალო v დილა
28 ნოემბერი, 19:00 | დილა v თელავი
4 დეკემბერი, 15:00 | დინამო (ბთ) v დილა.
