„ისწავლეთ მისი გვარი: მამარდაშვილი" - Marca-ს სტატია ქართველი მეკარის დებიუტზე

გიორგი მამარდაშვილი, გიორგი დემეტრაძის („სოსიედადი“ - 2000-2002); შოთა არველაძისა („ლევანტე“ - 2007-2008) და გიორგი ქოჩორაშვილის („ლევანტე“ – 2019-დან დღემდე) შემდეგ, ისტორიაში მე-4 ქართველია, რომელმაც ესპანეთის უმაღლეს დივიზიონში ითამაშა.

20 წლის მეკარეს „ვალენსიას“ რიგებში ფანტასტიკური დებიუტი გამოუვიდა და „ხეტაფესთან“ 1:0 მოგებაში, 4 სეივითა და სტაბილურად დამაჯერებელი თამაშით, სოლიდური წვილი შეიტანა. ცნობილი გამოცემების Whoscored-ისა (შეფასება 7.82) და SofaScore-ს (შეფასება 8.1) ვერსიით, მატჩის საუკეთესო ფეხბურთელად სწორედ მამარდაშვილი დასახელდა.

„ისწავლეთ მისი გვარი: მამარდაშვილი - „მესტალიას“ ახალი გმირი“

სწორედ ასეთი სათაურით ვხვდებით სტატიას მადრიდული Marca-ს ვებგვერდზე. პოპულარული და გავლენიანი გამოცემა ახალგაზრდა ქართველის დებიუტს აფასებს და აღნიშნავს, რომ გიორგი მოედანზე ვალენსიელთა გადასარჩენად იყო.

გიორგი მამარდაშვილი, საქართველოდან. დაწერეთ და ისწავლეთ მისი სახელის გამოთქმა. ეს ბიჭი აქ დასარჩენადაა. იგი დადგა კარში და უკვე მოიპოვა უპირატესობა იასპერ სილესენთან და ხაუმე დომენეკთან. ახალგაზრდა ქართველმა წინასასეზონო ეტაპზე თავი გამოიჩინა, მაგრამ „მესტალიაზე“ გამართულ სადებიუტო მატჩშივე გახდე გმირი და 92-ე წუთზე შესრულებული ბრწყინვალე სეივის შემდეგ ოვაციები მოგიწყონ, ეს კიდევ სხვა სიმაღლეა.

გიორგიმ შესანიშნავი სამეკარეო თვისებები გამოავლინა. პირველ ტაიმში ჰაერიდან რამდენიმე რთული ბურთი მუშტებით გააუვნებელყო. მეორე ნახევარში კი იყო სეივები და ისეთი მომენტები, როცა მეტოქის მწვრთნელი გოლის აღსანიშნავად ემზადებოდა, მაგრამ ყველაფერი მამარდაშვილის დომინაციით სრულდებოდა. საოცნებო დებიუტი და მსაჯის სასტვენის შემდეგ ბალახზე დაცემა მაშინ, როცა თანაგუნდელები მასთან მისალოცად მირბოდნენ. ახლა ეს უნდა ვთქვათ - მა-მარ-დაშ-ვი-ლი.

იმის მიუხედავად, რომ ლა ლიგის პირველ ტურში ჯერ მხოლოდ ეს ერთი შეხვედრა ჩატარდა, უკვე შეიძლება ვივარაუდოთ, რომ გიორგი მამარდაშვილი ტურის სიმბოლურ ნაკრებში მოხვედრის კანდიდატებს შორის, წესით, აუცილებლად იქნება.

მამარდაშვილის „ვალენსია“ ლა ლიგის მეორე ტურის მატჩს 21 აგვისტოს ითამაშებს და სტუმრად ანდალუსიურ „გრანადას“ შეხვდება.