ფიგუ პერესის აუდიოჩანაწერზე: "ვესაუბრე და მან მომიბოდიშა"

ბოლო დღეებში ინტერნეტსივრცეში ფლორენტინო პერესს აუდიოჩანაწერები გაუვრცელეს, რომლებშიც ის კლუბის წევრებსა და ფეხბურთელებს აუგად მოიხსენიებს.

ერთ-ერთი ასეთი მათგანი იყო ლუიშ ფიგუც, რომელზეც დონ ფლორენტინომ შემდეგი რამ თქვა: „ფიგუს რაც შეეხება, მან გასახდელში ყველაფერი გააფუჭა. ორი აზრი არაა, რომ ზიდანი მასზე უკეთესი ფეხბურთელი იყო. ფიგუ ღორის შვილია. ზუსტად ისე, როგორც რაული. ფიგუ და რაული ყველაზე ცუდები იყვნენ“.

თავად ფიგუმ ამის შესახებ პირველი კომენტარი Marca-სთან გააკეთა და აღნიშნა, რომ მასსა და პერესს შორის საუბარი უკვე შედგა:

„ვფიქრობ, რომ პირად საუბრებში შენ შეგიძლია ისეთი რამ თქვა, რაც შემდეგ კონტექსტიდან იქნება ამოღებული. აუდიოჩანაწერების შემდეგ მე პერესთან საუბარი მქონდა, მან მომიბოდიშა. ეს საკითხი დახურულია“. - თქვა ფიგუმ.

ერთ-ერთი ბოლო ჩანაწერი, რომელიც პერესს გაუვრცელეს მესუთ იოზილის შესახებ იყო.

„როცა იოზილი მადრიდში ჩამოვიდა, ცხოვრების სტილი შეიცვალა, შეყვარებულს დაშორდა და იტალიელ მოდელთან ურთიერთობა გააბა. ის პირადი თვითმფრინავით მილანში გაფრინდა, მასთან სექსი ჰქონდა და შემდეგ უკან დაბრუნდა.

ერთ დღესაც მოურინიო მასთან მივიდა და ეუბნება: ჰეი შენ, იოზილ. კონფიდენციალურად გესაუბრები ისე როგორც შენი მამა, მეგობარი. კი, ასეა. მასთან ინტერისა და მილანის მთელი შემადგენლობა იწვა, ორივე გუნდის სამწვრთნელო შტაბის ჩათვლით“. - ვკითხულობთ El Confidencial-ის მიერ გავრცელებულ ჩანაწერში.