დამნაშავე დაკავებულია - ლინდელოფმა მოხუცი ქალი გაძარცვისგან იხსნა

სულ ცოტა ხნის წინ შვედეთის საინფორმაციო სამსახურმა, Aftonbladet-მა გაავრცელა ინფორმაცია იმის შესახებ, რომ "მანჩესტერ იუნაიტედისა" და შვედეთის ნაკრების ცენტრალურმა მცველმა, ვიქტორ ლინდელოფმა, მოხუცი ქალი გაძარცვას გადაარჩინა. შემთხვევა დღეს დილით, შვედეთის დროით 10:30-ზე, ქალაქ ვასტერასში მოხდა.

90 წლის ქალბატონი ქუჩაში მიდიოდა და დამნაშავე სწორედ ამ დროს დაესხა თავს. ქურდმა ქალბატონის ხელჩანთის წართმევა სცადა. 

ამ ყველაფერს ლინდელოფი შეესწრო და უმალ გადაწყვიტა ხანდაზმული ადამიანის დახმარება. ვიქტორმა საკუთარი ფიზიკური მონაცემების წყალობით  დამნაშავე გააკავა და პოლიციის მოსვლამდე არსად არ გაუშვა.

სამართალდამცავების მოსვლის შემდეგ დამნაშავე შესაბამის დაწესებულებაში გადაიყვანეს. რაც შეეხება დაზარალებულს, ქალბატონი თავს ახლა კარგად გრძნობს და საფრთხე აღარ ემუქრება.

შეგახსენებთ, რომ ვიქტორ ლინდელოფი ამჟამად შვებულებაშია და სამშობლოში ოჯახთან ერთად ისვენებს.